叠影迷情之116 端午唱龍舟評彈政改

端午唱龍舟評彈政改

「唱龍舟」是舊日廣東一帶一些民間藝人，在每逢佳節前，拿著一根長木桿，上面橫放著一艘小木人偶扒的龍舟，一邊唱一邊拉著繫著小木人龍舟的幼線，扯動著那些小木偶兒，唱的都是諷刺時弊，緣門求大戶人家打賞幾個小錢。

時移勢易，香港全是高樓大廈，再沒昔日的木櫳門，現在往往住在地下的都變成商舖，也甚少像以前每家每戶般打開大門乘涼，與街坊鄰里串門子，大家互相建立良好關係，現在是各家自掃門前雪，也甚少知道隔鄰是姓什名誰，以前那種街坊街里的良好關係網已蕩然無存，再沒人唱龍舟，更是後繼無人，這門通俗的民間藝術已成為絕唱，至於在大陸，先經過共產黨將傳統文化努力清除，再經文化大革命過濾得一乾二淨，就算是六十後的一代也不知唱龍舟為何物了。

這些失傳的民間藝術唱的小調兒多是「急就章」的急口令，有節拍、字句押韻，充滿廣東人的刻薄言語和蠱惑佻皮，洋溢通俗的幽默感，跟廣東的「南音」又有不同，南音是押韻有平仄聲而詞句藻麗，唱龍舟是打油詩，雅俗有別，與北方的唱「蓮花落」相同，亦類似「蟼夕」時街頭巷尾的神婆打小人的精句。時正端午佳節，就找個會唱龍舟的民間藝人來，讓各位開開心，因為此種藝術早已煙滅，會稍有走樣，倒不如就當是新派唱龍舟，請各位讀者多多包涵。

也要先旨聲明，唱龍舟是廣東民間藝術，不免會有不少廣東話文法。好了，說了一大堆介紹典故，唱龍舟的師傅周隆暢已來了，要開始了。

「各位鄉親父老，現由周維暢師傅來表演唱龍舟，周師傅走遍大江南北，見過世面，更是丐幫第三十八代掌門人，丐幫祖宗爺洪七公第七十代嫡傳頒為粵派唱龍舟傳人。」主持人介紹後，略向後面的周維暢欠身道：「周師傅，有請。」

「督撐、督撐、茶督撐、水督撐、督督撐。」周維暢穿著灰色殘舊長衫，五十來歲，中等身形，個子瘦削，頭髮稀疏泛白，一臉風霜，面上縐紋是積聚了人生經歷的印記，左手拿著龍舟棒子，右手拿著拍板兒敲打，行動敏捷地跳躍出來唱急口令：「今日睇見香港地，人人爭拗霎晒氣，宣轉政改做場戲，實情搵笨兼歪理，政改依然有禁忌，仍然剩係個幾味，刷鞋特首好卑鄙，猛叫起錨預埋你，那管係生張熟李，官商勾結共謀利，功能組別為自己，當正市民係臭四，大揮公帑請臨記，依起棚牙扮歡喜，成班官僚放臭屁，力求市民咪放棄，勿為民主撐餐死，激氣，激氣，真激氣。」

「唉，助桀為虐民建聯，奮力支持假普選，死鬧泛民起爭端，搞到社會大混亂，支撐打到泛民扁，自由民主全送斷，擁護共產一黨專，其實暗裏有打算，利益怕會有受損，祇望中央會恩眷，利益一眼睇得穿；千瘡百孔爛政權，社會問題亂一團，貧富不均積民怨，若要政治能健全，真正開放有灣轉，多D順從人民意願，先讓特區有普選，作為普選新試點，眼光要放得長遠，國家富強益子孫。」

「祇怕係成班特區領導，攬住爛『荒』案踏原步，帶住香港市民走遠路，完全荒謬唔係好路數，筋疲力盡搞到亂糟糟，仲要冇個樣搵個樣做，曾特首又學埋啲鬼子佬，效仿人地攪場辯論騷，閂埋門禁止一切報導，唔准旁觀離鬼晒大譜，搵個女大狀『黎』鬥對訴，更見佢頭大居然冇腦，腦大卻塞滿晒枯草，擺明想顯示野心企圖，反而暴露佢絕頂糊塗，中央見佢咁更添煩惱，卑佢帶領香港點會仲有前途？唉！真係冇晒前途，冇晒前途，嗚呼哀哉都唔知點算好？點算好？」

「得、得、得得得…..。」有如馬蹄聲響，也不知是周維暢的口技還是他手上拍板兒弄的節拍聲？還是兩聲齊發？他扭動脖頸子，轉一圈，唱諾：「起錨自有人支持，猛講政改不可再延遲，到底係唔係真係如此？都祇不過係見仁見智。」

「特首主要條件係做應聲蟲，剛啱佢性格又係刷鞋童，明眼人睇穿佢係蟲或係龍，搵佢做特首時見佢毛都鬆，切勿咪以為佢係大智大勇，其實多年來佢都冇鬼用，最叻係將自由民主全斷送，對北大人似係諸候去朝貢，次次去述職好似去獻奉，遷就晒啲搞地產班大富翁，香港地咁細祇係粒塞豆窿，無須做到自己咁鬼恐共，祇係想佢郁手煮番餐好餸，市民唔需要食乜野大龍鳳，唔駛佢嗌住打好呢份好工，搞吓搞吓佢已經就嚟够晒鐘，罧吓罧吓都懷念當年老幪董，至少冇佢咁鬼盲從，一味怕中共話佢唔夠效忠，呢個三煞位邊個坐籮柚都俾針拮到痛 (文雅點說就是如坐針氈)。」

周維暢搖搖頭嘆惜道：「佢聲嘶力竭係度嗌得真幸苦，市民分化佢都冇晒符，最慘係兩邊都唔能夠兼顧，反對聲音激烈到令佢難猜估，睇見班領導高官真係無辜，成日夾埋去掃樓擇戶，同啲居民拗到不亦樂乎，誓要將假政改極力保護。」

「大陸既無真正律法，剩係識禁制並無他策，將愛國人士當作逆賊，又拉又鎖將愛侶分拆，豆腐渣工程卻不能查察，地震無辜生命向誰問責？貪官早已把錢財全搜刮，漠視人民性命真係賤格，唔好再用暴政去鎮壓。」

「國泰民安要有民主，唔應該做到咁鬼鼠，閂大門唔准民主豎，鋪鋪牌都唔肯認輸，咁樣點對得人民住，而家勞資工潮到處，好值得中央去關注，又佢哋點樣步署？叻人趁而家去晒淤，咁先至係中流砥柱。」

周維暢唱到此處，擰頭擰髻，面色一沉，滿是感慨：「又攞番當年六四嚟講，屠城决策者好多去咗見閻羅王，佢哋滿手沾血唔怕髒，死都誓要將真相儘量隱藏，逼晒啲精英要四處流亡，當年中央大部份人都係喪心病狂，呢種做法真係笨夾戇，瞪大雙眼住屠城惨況，死硬派緊握政權唔肯放，猛將一點點民主活活埋葬，呢件係近代史嘅大毒瘡，打正招牌做真正嘅共產黨。」

此時司儀走出來，揚著右手，左手在揩眼淚，道：「好了，好了，不用再唱下去了，端午節是人人開心吃椶子，不是弄得拼命提著傷心事悼念屈原那種忠心愛國精神，往事勿提了，各位，聽過唱龍舟就算了吧。」

周維暢嘆了一聲：「各位切勿說我唱得差，我祇不過是揭吓瘡疤，各位後會有期，今日以此為記。」

(2010年6月15日端午節前夕)